真係好唔容易，用咗半年時間先至補返去年嘅BLOG。。。
呢兩個景點係相連嘅，曼聽公園係西雙版納最古老嘅公園，位於瀾滄江與流沙河匯合嘅三角地帶，以前係傣王御花園，已有1300幾年歷史。景區集中體現咗「傣王室文化、佛教文化、傣民俗文化」三大主題特色。
總體嚟講就係一個充滿異域風情嘅公園，日間呢度係公園，到咗夜晚，會有「瀾滄江·湄公河」之夜嘅文藝演出，包括自助餐、演出同篝火晚會。
由公園另一個門出去就到總佛寺，係西雙版納巴利語系佛教最高等級嘅寺院，亦都係喺文革期間被徹底損毀並喺改革開放以後重建嘅，入面金碧輝煌，非常精美，院內仲養咗好多孔雀，只可惜大雄寶殿當日冇對外開放。
基本上呢兩個係西雙版納必去景點，入面亦冇乜商業成份，所需時間唔長，大概一共2個鐘頭以內就可以全部行完。
評論請移步微信公眾號
讚賞
